Astelehenean euskarazko prentsaren aldeko agerraldia egin zen Sakanako Mankomunitatearen egoitzan. Sakanako udal ordezkarien eta euskalgintzako ordezkaritza zabala bildu zen.
Lorea Agirreren testua irakurri zen:
Izan gaitezen
Izan paperezko, izan uhinezko, izan ikus-entzunezko, izan
sareko. Izan herriko, izan eskualdeko, izan nazio mailako. Izan informazio
orokorreko, izan musikako, izan ekonomiako, izan umeentzako edota
gurasoentzako, izan bertso zaleentzako, izan gozozaleentzako, izan zientziako,
izan pentsamenduko, izan umorezko, izan zinemako, izan ehiztarientzako, izan
dekorazioko, izan eskolako. Izan segunduroko, izan eguneroko, izan asteroko,
izan hilabeteko, izan urteroko. Izan.
Izan, hedabideak beharrezkoak dira hizkuntza bide
bidezidor errepide eta autopista zahar eta berrietan abia arazteko. Izan
asfaltozko, izan goroldiozko, izan hodeiezko. Beharrezko dira hiztunak,
itxitura eta atakak ireki, eta bide horietan barrena bidaian abiatzeko, eta
bidean elkar ezagutzeko, eta talde egiteko eta etxeko sentitzeko. Beharrezko
dira munduari begiratzeko modu bat izateko: teilatu eta ispilu, geure
buruarentzat; leiho, geure begientzat; ate, inguruan ditugunentzat.
Izan ere, hedabide guzti-guztiak izan mundu berekoak dira. Euskararen
mundukoak. Izan txiki izan erraldoi, izan txokoko izan erdiguneko, izan mendiko
izan araneko izan itxasoko. Denak dira beharrezko, denak elikatzen dute elkar,
denak behar dira hizkuntzak eta hiztunek izaten jarraituko badute.
Hedabideak, euskarazko hedabideak funtsezko dira gizarte eta kulturako ekimen
guztiak ezagutu zabaldu ezagutzera eman balioztatu eta indartzeko. Esan ohi da
zabalkunderik ez duen kultura ez dela kultura, elkar ezagutzen ez dutenak ez
direla talde, elkar elikatzen ez direnak ez dutela etorkizunik. Euskarazko
hedabideak herrigintza dira. Gugintza. Izan, izatea bermatzen laguntzen duten
hitzezko lur baten zutabeak dira.
Hedabide asko egoera makurrean daude: batzuk paperaren krisiak harrapatu
dituelako, askori diru iturriak apaldu zaizkielako, gehienak krisi ekonomikoak
azpian hartu dituelako eta ia denei laguntza publikoak gutxitu zaizkielako, eta
batzuri baita ukatu ere. Bakarra desagertzea denen galera da. Denona. Batzuk
desargertu dira dagoeneko, eta askoren iraupena arrisku bizian dago.
BERRIA egunkariarena, kasu. GUAIXE
aldizkaria eta BELEIXE irratiarena ere bai. Etorkizunean
izan izango bada gaur lagundu behar da, euskarazko hedabideak ez daitezen gal,
sendotu baizik, eta horrekin euskararen mundua izan izan dadin.
Lorea Agirre (moldatua)
No comments:
Post a Comment